दूरदृष्टी , कल्पकता आणि अंत्योदय साकारणारे नितीन गडकरी

अखंडितलक्ष्मीअलंकृत, सकळगुणालंकरण राजर्षी राजमान्य श्रीमंत नितीनजी यांचे सेवेसी सप्रेम नमस्कार व विनंती विज्ञापना जे -

श्री नितीन जयराम गडकरी या आपल्या नावातच एक विलक्षण दूरदृष्टी ही बघायवयास मिळते. या माध्यमातून आपली रोजची दिनचर्या बघून अचंबित व्हायला होतं. आपला प्रवास आणि सतत कार्यमग्न राहण्याची सवय बघून आम्हा सर्वांना सदैव प्रेरणा मिळत असते. आज केंद्रातील मंत्री म्हणून आपण सलग ९ वर्ष झाली रस्ते विकासाच्या माध्यमातून देशात रस्त्याचे नवनवीन जाळे विणत आहात. देशाच्या कुठल्याही भागात गेलो की, नागपूर म्हंटल की आपल्या नावाचे वेगळेपण अनुभवायला येतंच. खरंतर राजकारणी नेता समाजाभिमुख तळागाळातील कार्यकर्त्यांशी ही तितक्याच आपुलकीने कार्य करणारा असावा असे वाटते आणि आपण त्यात अग्रक्रमावर आहात. सर्वांशी एक होत आपले वेगळे अस्तित्व आहे याची जाणीव करून देण्याची इच्छा आणि आकांक्षा असलेले आणि संघ संस्कार नकळतपणे लहानपणापासून भिनलेले आणि विद्यार्थी परिषदेपासून राजकारणात असलेले प्रतिभावंत मुदसद्दी राजकारणी म्हणून होत असलेली आपली जगन्मान्य ओळख आम्हाला नागपूरकर म्हणून अभिमान वाटावा अशीच आहे. 

आज भारतभर महामार्गाच्या माध्यमातून आपण आपले नाव सुवर्णाक्षरांनी कोरले आहे. लोकाभिमुख कार्य करताना त्यांच्यातला एक होऊन कार्य करण्याची आपली आवड प्रत्येकाला जोडून ठेवत आहे. आज आपण नागपूरचा जो कायापालट करण्याचा ध्यास घेतला आहे त्याला शब्दात व्यक्त करणे कठीण असेच आहे. कुणीही नवा व्यक्ती नागपूरला आला की त्याच्या तोंडून आपुसक शब्द निघतात ते म्हणजे वाह.. नागपूर फारच बदलले आहे. आज नागपूर मेट्रोचे कार्य हे आपल्या कारकिर्दीत झाले याचा आम्हाला नागपूरकर म्हणून अभिमानच आहे. प्रत्येक नागपूरकरांना आपल्या कुटुंबातील एक ज्येष्ठ सदस्य असल्याचा विश्वास आपण निर्माण केला आहे. कुटूंब वत्सल आहात आणि कौटुंबिक सोहळ्यात आम्ही ते कायम अनुभवत असतो. पक्ष, पार्टी याचा मान ठेवत वैयक्तिक माणूसकीचे नाते आपण टिकवून ठेवले आहे त्यामुळे विरोधक सुद्धा आपल्याशी प्रसंगी राजकारण बाजूला ठेवत मैत्रीपूर्ण संबंध टिकवून ठेवण्यासाठी तत्पर असतात.  

आपण करत असलेले कार्य विलक्षण आदरयुक्त आणि अभिमान आणि अभिनंदनीय आहे आणि आम्हा नागपूरकरांचे आपण भूषण आहात. आपल्या सारखे नेते आणि राजकारणी आज देशाला वेगळ्या उंचीवर नेतील यात शंका नाहीच. आपल्या कार्यावर लिहिण्याचा माझा अधिकार नाही. पण आपला हितचिंतक आणि आपल्या कामावर निरतिशय प्रेम करणारा सच्चा कार्यकर्ता म्हणून या प्रभावी माध्यमातून शुभेच्छा देताना आनंद आणि गौरव होतो आहे. आपणांस जन्मदिवसाचे अभिष्टचिंतन. आई रेणुका आपल्याला उदंड निरामय आरोग्य प्रदान करो हीच तिच्या चरणी प्रार्थना..💐🙏🌷🌷

बहुत काय लिहिणे ? अगत्य असू द्यावे ही विज्ञापना. 

- सर्वेश फडणवीस