कोरोना रुग्णांच्या आधारवड डॉ.मृणाल हरदास..

सर्वप्रथम सर्व स्त्री शक्तीला महिला दिनाच्या शुभेच्छा. आज जागतिक महिला दिन. जगन्मान्य असलेल्या ह्या दिनाचे औचित्य साधत काय लिहावे आणि कुणाबद्दल आणि किती लिहावे असा प्रश्न सारखा मनात येत होता. स्त्री.. सुंदर ईश्वरी अविष्करण. आज स्त्री सर्व क्षेत्रात कार्य करते आहे आणि सर्व शिखर पादाक्रांत करते आहे, खरंतर ही कौतुकाची बाब आहे. स्त्री शक्तीला, तिच्या भक्तीला शब्दच नाहीत. कुठल्याही कार्यक्षेत्रात झोकून काम करायला सदैव तयार असणाऱ्या स्त्रीशक्तीचा गौरव करण्याचा हक्काचा दिवस म्हणजे जागतिक महिला दिन आहे.

मागचे पूर्ण वर्ष कोरोनामय गेले,आजही कोरोनाच्या केसेस वाढत आहे. पण ह्या कोरोनाकाळात कोरोना योद्धा म्हणून कार्य करणाऱ्या नागपूरातील मेयो हॉस्पिटलमध्ये औषध विभागाच्या सहाय्यक प्राध्यापिका डॉ.मृणाल हरदास यांची वेगळी बाजू मनाला प्रकर्षाने भावली आणि कुठेतरी ते प्रत्येकापर्यंत पोहोचले पाहिजे ह्या भावनेतून लिहिण्याची ऊर्जा मिळाली आणि त्यातून हे लेखन आहे. 

लॉकडाऊनच्या काळात हा खालील फोटो प्रचंड वायरल झाला आणि त्यातूनच डॉ.मृणाल हरदास ह्यांची सकारात्मक कार्याची श्रीमंती जगाला दिसली. खरंतर आई होणे हे जगातील कुठल्याही स्त्रीसाठी सर्वांत मोठी गोष्ट आहे. मातृत्व हा एक धर्म आहे. ते निभावण्यासाठी कुठलीही स्त्री ९ महिने ९ दिवस रक्ताचे पाणी करून गर्भातल्या जीवाला स्वत:पेक्षा अधिक जपत असते. बाळ कधी एकदा गर्भातून बाहेर येईल आणि त्याला कधी जवळ घेऊ असे प्रत्येक गरोदर महिलेला वाटत असते. पण नियतीची इच्छा असेल तसेच होते, प्रसूतीनंतर बाळाला पाहण्यासाठी आसुसलेल्या ह्या आईला करोनाने अचानक गाठले. प्रसूतीच्या अगदी काही तासांपूर्वी तिचा अहवाल पॉझिटिव्ह आला आणि त्यामुळे नुकत्याच जन्माला आलेल्या बाळाला करोनाची बाधा होऊ नये म्हणून आईपासून त्या मुलाला नाईलाजाने दूर ठेवण्यात आले होते. १४ दिवस आईला आपल्या मुलाला बघता येऊ नये ह्यासारखे दुसरे दुःख कुठले असेल पण कोरोनावर मात करत आपल्या मुलाला मातृवत प्रेम करताना त्या आईच्या काय भावना असतील ह्याला शब्दांत सांगता येणारच नाही. पण डॉ.मृणाल हरदास ह्यांनी त्या आईच्या भावनांना कृतीची जोड दिली आणि त्या आईच्या पाठीवरून जो मायेचा हात फिरवत प्रसंगी जो आधार दिला तेव्हा जे सकारात्मक चित्र समाजात आले तो दिवस सुवर्णाक्षरांनी लिहावा असाच दिवस ठरला आहे. 

डाॅ. मृृणाल हरदास सध्या मेयो हाॅस्पिटलमध्ये कोविड विभागाच्या प्रमुख आहेत. प्रचंड मेहनत,कामाप्रती असलेली निष्ठा आणि समर्पण ह्या त्रयींवर त्यांनी आलेली प्रत्येक जबाबदारी समर्थपणे सांभाळली आहे. जगभरात कोविड विरुद्धच्या लढ्यात औषधशास्त्र विभागाची भूमिका अग्रस्थानी आहे. आज भारताने जगाला लस दिली आणि हळूहळू कोरोना योध्दे,ज्येष्ठ नागरिक स्वतः पुढे येत लसीकरण करवून घेत आहे आणि समाजात योग्य संदेश त्यातून जातो आहे. 

खरंतर कोविड रुग्णांना औषधापेक्षा मानसिक आधाराची अधिक गरज आहे आणि हेच ओळखून डाॅ.मृृृृणाल हरदास ह्यांनी त्यांच्याशी संवाद साधत त्यांना आपलेसे केले आहे. मनात कुठलीही भीती न बाळगता त्या थेट कोविड रुग्णांशी संवाद साधत आहे. आजही प्रत्येक कोविड संक्रमित व्यक्ती त्यांना फोन करून औषधाबद्दल माहिती घेत असतात आणि त्याही निःस्वार्थ भावनेने प्रत्येक व्यक्तीला योग्य मार्गदर्शन करत असतात. अतिशय सकारात्मक वलय स्वतःभोवती निर्माण करणाऱ्या डाॅ.मृृृृणाल हरदास आज प्रत्येकाच्या देवदूत बनल्या आहेत. 

आत्मीयता,ममत्व जपणाऱ्या डाॅ.मृृृृणाल हरदास आज सगळ्यांना हव्याहव्याशा झाल्या आहेत. प्रत्येकाची आस्थेनं चौकशी करण्याची त्यांची शैली आज अनेकांना प्रेरणा देणारी आहे. सरकारी आरोग्य यंत्रणेतील आशादायी आणि प्रेरणादायी चेहरा म्हणून त्यांच्याकडे बघितले जाते. प्रत्येकाशी मातृवत प्रेम आणि काळजी घेणाऱ्या  

डाॅ.मृृृृणाल हरदास ह्यांच्या कार्याला नमन आहेच. आपले कार्य सदैव प्रेरणा देत राहो हीच आज महिला दिनी शुभकामना आहे. 

✍️ सर्वेश फडणवीस 

#internationalwomensday2021 #womensupportingwomen #CoronavirusPandemic #CoronaWarriorsIndia