राष्ट्रांकुर..

भारतीय सैनिक शौर्य, निर्धार अन्‌ निष्ठा यांचे मूर्तिमंत प्रतीक. सियाचीनच्या -50 अंशापासून रणरणत्या वाळवंटाच्या + 50 अंश सेल्सिअस तापमानापर्यंत, असीम आकाशापासून अथांग सागरापर्यंत आपल्या पराक्रमाचा ठसा उमटवणारा हा सैनिक. देशाच्या सीमेवर डोळ्यात तेल घालून पहारा देत असतो आणि म्हणून तुम्ही आपापल्या उबदार घरट्यात सुखाची झोप घेऊ शकता. तुमच्या उद्यासाठी आपला आज देणारा असा जो तो म्हणजे सैनिक आहे. जिद्‌द, चिकाटी आणि पूर्ण समर्पित होऊन कार्य करण्याची प्रेरणा सैनिकांकडून मिळतं असते. 

ज्या अभेद्य कवचामुळे आपण सुरक्षित आहोत ते कवच म्हणजे- सैनिक. कृष्णाच्या गीतेतील कर्मयोग्याचे मूर्तिमंत प्रतीक म्हणजे- सैनिक. आपले घर उन, वारा, पाऊस या सर्वांपासून रक्षण करते त्याप्रमाणे सैनिक स्वतःला मृत्यूच्या दाढेत ढकलून आपल्या देशाचे शत्रूपासून रक्षण करतो. असा हा सैनिक सर्वांना कळला पाहिजे. सैनिक या व्यक्तिरेखेला अनंत पैलू आहेत. हे पैलू जाणून घेणे गरजेचे आहे. राष्ट्राच्या एकात्मतेसाठी आणि अखंडतेसाठी त्यांच्या बलिदानाची आठवण काल पराक्रम दिवसाच्या निमित्ताने मा. पंतप्रधानांनी स्वागतार्ह पाऊल उचलले आहे. भारताच्या गौरवशाली इतिहासातील असे शहीद म्हणजे परमवीरचक्र मिळवणारे २१ पराक्रमी वीर आहेत. या शौर्यगाथा आपल्या सर्वांनाच राष्ट्राचा विचार करून आपली सर्वोच्च कृती करण्यासाठी प्रेरणा देणाऱ्या ठराव्यात यासाठी या समकालीन नायकांना या माध्यमातून मांडण्याचा प्रयत्न करतोय. 

सैन्यदलाबद्दल आणि पर्यायी सैनिकांबद्दल नितांत आदर, अभिमान, श्रद्धा, विश्वास हा प्रत्येक भारतीय नागरिकाच्या मनात उजागर व्हायला हवा, ही ज्योत सतत पेटती राहायला हवी. ही सैन्यदलांची गरज नाही, आपलं कर्तव्य आहे आणि या कर्तव्याप्रति प्रत्येकाने अधिक सजग आणि जागरूक होऊन देशभक्तीची ज्योत प्रत्येकाच्या मनात जागवण्यासाठी मी तत्पर राहील हाच संकल्प घेण्याची आवश्यकता आहे. खरंतर राष्ट्र ही संकल्पना आपल्या सर्वांच्या मनात सदैव तेवत रहावी आणि त्यानुसार आपली कृतीही व्हावी यासाठी २१ दिवस या राष्ट्रांकुरांची ही लेखमाला लिहिण्याचा प्रयत्न करतोय. चला तर मग, हा राष्ट्रभक्तीचा अंकुर आपण आपल्या मनात जतन करू, जोपासू आणि वेळ येईल तेव्हा राष्ट्रर्पण करू. आदरणीय अनुराधा प्रभुदेसाई अर्थात सगळ्या सैनिकांची अनुमावशी यांच्या 'सैनिक' पुस्तकातील या ओळी मला प्रचंड आवडतात, 

माघारी जेव्हा जाल परतून,

ओळख द्या आमची त्यांना 

आणि सांगा,

तुमच्या 'उद्या' साठी आम्ही आमचा 'आज' दिला.

 सर्वेश फडणवीस

#rashtrankur  #ParamVirChakra