पुढे पडलेले मराठी पाऊल..🚶🚶‍♀️

सध्या कोरोना आणि तत्संबंधी बातम्यांच्या नकारात्मकतेच्या गर्दीत काहीतरी सकारात्मक आणि अनेकांना प्रेरणादायी वाटावे या हेतूने नवी लेखमाला लिहिण्याचा विचार आला. लेखमाला प्रेरणादायी असावी हा उद्देश्य ठेवूनच विचार करतांना वाटलं की यावेळी मराठी उद्योजकांबद्दल लिहावे कारण आपल्याला कोरोनाने अनेक गोष्टी शिकवल्या पण उद्योजकांना ज्या प्राप्त परिस्थितीतून मार्ग काढावा लागतो आणि प्रत्येक यशस्वी उद्योजक आलेल्या प्रत्येक संधीचे सोन्यात रूपांतर करतो. अशा यशस्वी उद्योजकांची गौरवशाली गाथा " पुढे पडलेले मराठी पाऊल.." या नावाने नव्या लेखमालेच्या माध्यमातून लिहायला घेतो आहे.

'मराठी पाऊल पडते पुढे' असे आपण नेहमी म्हणतो पण या लेखमालेच्या निमित्ताने 'पुढे पडलेले मराठी पाऊल..' जे आज यशोशिखरावर असतांनाही अनेकांच्या पसंतीस उतरत आहेत अशा उद्योजकांच्या कार्याबद्दल,त्यांच्या आजच्या एकंदर परिस्थितीबद्दल या लेखमालेच्या निमित्ताने आपल्याला वाचायला मिळणार आहे.

आपण बऱ्याच वेळा आपआपसात बोलत असतो कि मराठी लोकांनी व्यवसाय क्षेत्रात उतरायला पाहिजे, व्यवसाय करायला पाहिजे पण आपण जेव्हा स्वतःचा व्यवसाय सुरु करायचा विचार करतो तेव्हा आपल्याला खूप समस्यांना तोंड द्यावे लागते आणि मग आपण व्यवसायिकतीकडे मागे बघत व्यवसायाचा विचार मनात ठेवतो पण तो आचरणात आणत नाही. प्रत्येकवेळी चर्चा होते पण त्यावर मार्ग मिळेलच असे नाही. या लेखमालेच्या निमित्ताने एक ध्यास,एक पाऊल,मराठी उद्योजक घडवण्याकडे असणार आहे.

आज उद्योजक म्हटलं कि त्यांचा काही ना काही व्यवसाय असतो हे प्रत्येकाला माहीतच आहे पण लक्षात घ्यायला हवं की त्या यशस्वी व्यवसायाच्या मागे त्यांची अफाट अशी मेहनत असते आणि त्यांच्या मेहनतीकडे दुर्लक्ष करता येत नाही. उद्योगाची भरभराट होत असतांना त्यांच्याकडे सकारात्मकतेचे जे वलय असतं त्यातून त्यांचा विश्वास अधिक दृढ होत असतो. अशाच काही प्रेरणादायी उद्योजकांबद्दल त्यांच्या गौरवशाली कार्याबद्दल या लेखमालेतून जाणून घेऊ या… 

✍️ सर्वेश फडणवीस

#पुढे_पडलेले_मराठी_पाऊल #मराठी_उद्योजक #लेखमाला