आठवणीतील खजिना ✨✨

काही गोष्टी या कायम स्मरणात असतात. अशीच ही घटना. २४ एप्रिल २००७ ला एका घरगुती कार्यक्रमाचे निमंत्रण देण्यासाठी आदरणीय नानासाहेब शेवाळकर यांच्या घरी जाण्याचा योग आला. घरी गेल्यावर त्यांच्या अभ्यासिकेत आ.नानासाहेब काहीतरी सांगत होते आणि त्यांची लेखनिक ते सगळं टिपत होती. त्यांचं घर ही बघण्यासारखे आहे. प्रशस्त दिवाणखाना,प्रसन्न देवघर वगरे बघितल्यावर पहिल्या मजल्यावरील त्यांच्या अभ्यासिकेत गेल्यावर विलक्षण ऊर्जा जाणवत होती. आ.नानासाहेबांचे छायाचित्र ते ज्या ठिकाणी बसायचे त्याच्या मागे लावले होते . टेबल,खुर्ची आणि अवतीभवती श्रीमंत करणारी पुस्तकं आणि त्यांना मिळालेले सन्मानपत्र आणि स्मृतीचिन्ह अगदी व्यवस्थित ठेवले होते. त्या अभ्यासिकेत साक्षात सरस्वती निवास करते की काय इतकी विलक्षण प्रसन्नता जाणवत होती. तो प्रसंग आजही डोळ्यांसमोर तसाच आहे. त्या वयात इतकी समजही नव्हती की त्यांच्याशी कसे बोलावे आणि काय बोलावे आणि कशाबद्दल बोलावे. पण त्यांना फक्त बघणे हीच खूप मोठी पर्वणी होती. गेलो आणि  डोकं टेकवत नमस्कार केला आणि आजूबाजूला बघितले आणि निघालो. निघतांना त्यांनी आवाज दिला आणि भेट म्हणून या दोन कॅसेटचा संच दिला. या दोन कॅसेट म्हणजे सीता चरित्र आणि दुर्योधन चरित्र आहे. आजही ही भेट जपून ठेवली आहे.

आ.नानासाहेबांच्या घराचा एक नियम जो मला प्रचंड आवडला आणि त्यानंतर जमेल तसा आचरणात आणण्याचा आजही प्रयत्न करतोय तो म्हणजे घरातून कुणीही-कधीही उपाशी बाहेर पडत नाही. आ.नानासाहेबांना आलेल्या प्रत्येकाला खाऊ घालण्याची फारच आवड होती त्यांची ती आवड आजही शेवाळकर सदनात कटाक्षाने पाळली जाते आहे. आज काळाच्या ओघात कॅसेट कालबाह्य झाली तरी त्यांनी दिलेली ही भेट जपून ठेवली आहे. आम्हा नागपूरकरांना खऱ्या अर्थाने साहित्य क्षेत्रात स्वतःच्या वाङ्मयीन ऐश्वर्याने श्रीमंत करणारे विद्यावाचस्पती,वक्ता दशसहस्त्रेषु आ.राम शेवाळकर आहेत. 

नुकतेच आ.मारुती चितमपल्ली हे सोलापूरला स्थायिक होणार म्हणून नागपूरकरांच्या वतीने शेवाळकरांच्या घरी त्यांचा छोटेखानी सत्कार समारंभ आयोजित केला होता त्यावेळी आ.चितमपल्ली सरांनी निघतांना सांगितलेले शब्द आजही आठवणीत आहे ते म्हणाले होते " या घरात सरस्वती निवासाला आली आहे,आणि तिची सदैव कृपा राहणार आहे." खरंच यातच सारं आलं आहे. आ.नानासाहेब शेवाळकर आमच्या सदैव स्मरणात राहणार आहे. त्यांच्या स्मृतीस विनम्र अभिवादन 🙏🏼🙏🏼

✍️ सर्वेश फडणवीस