मानाचं पान - सुधीर गाडगीळ !! 📖

सुधीर गाडगीळ याचे एक छान आणि आपल्यापैकी अनेकांच्या खाणे या आवडीच्या विषयावरील पुस्तक वाचनात आले. प्रसिद्धीच्या यशोशिखरावर असलेले वलयांकित लोक खातात तरी काय ? या आशयावर आधारित फक्त ११२ पानी असलेले हे पुस्तक वाचनीय आहे आणि संग्रही असावे असेच आहे. घनश्याम पाटील यांच्याकडून मागवले आणि न राहवता लगेच वाचून संपवले.

आज सुधीर गाडगीळ हे नाव मुलाखती आणि सूत्रसंचालन या क्षेत्रांत सुवर्णाक्षरात नोंदवून ठेवावे असेच आहे. प्रख्यात मुलाखतकार,निवेदक म्हणून ते जगन्मान्य आहेत. प्रत्येक मराठी माणसाने त्यांच्या मुलाखती ऐकल्या असतील,वाचल्या असतील आणि बघितलेल्या असतील पण त्यांनी स्वतः या मानाच्या पानात स्वतःच्या अनुभवाबद्दल सगळ्यात शेवटी मांडलेले आहे. खरंतर ते सगळ्यात पहिल्यांदा वाचायला हवे असं वाटतं. त्यांच्या मानाच्या पानावर ते लिहितात, खाणे,गाणे,बोलणे हे माझे वीक पाँईटस आहेत आणि खाताना कुणी बोलणारा समोर असेल तर खाण्याला चव येते आणि पदार्थांच्या चवीवर चवीष्टपणे टिप्पणी करत खाल्लं तर गप्पांची मैफलही जमते नि खाण्याची रंगतही वाढते.

फक्त ११२ पानांच्या पुस्तकात जगातील सर्वोत्कृष्ट खाण्याच्या ठिकाणांची जगभ्रमंती आपल्याला पुस्तकातून सहज घडते. यातील प्रत्येक वलयांकित व्यक्तीच्या प्रवासातील खाण्याचे ठिकाण आणि त्यातील वर्णन वाचतांना आपणही काहीकाळ त्या ठिकाणी त्याचा आस्वाद घेतोय की काय असा अनुभव येतो. जगभरातील हाँटेलमध्ये गेल्यावर तेथील खाद्य भ्रमंती,तिथल्या खाद्य पदार्थांची चव, नुसत्याच शाकाहारी किंवा मांसाहारी नाही तर कसं,काय खावं याबद्दलही भरभरून लिहिल्यावर तेथील संपूर्ण वातावरणाची सफर त्यांनी आपल्यासारख्या वाचकांना करून दिली आहे.

प्रेमाने खिलवणारी आणि मनमुक्त खाणारी मंडळी मोकळीढाकळी असतात असा सुधीर गाडगीळ यांचा अनुभव आहे. केवळ भूक लागलीय म्हणून खाणं उरकणारे वेगळे आणि विशिष्ट पदार्थांसाठी हॉटेल हुडकत जाणारे चविष्ट वेगळे. मुळात ही वलयांकित लोक काय खातात?कुठे खातात?कसे खातात? याबद्दल त्यांनी केलेल्या गप्पांच्या नोंदी म्हणजे हे मानाचं पान आहे.

जवळपास ३१ वलयांकित व्यक्तींच्या खवय्येगिरी वर त्यांनी यात छान प्रकाश टाकला आहे. पुण्यातील चपराक प्रकाशनाच्या घनश्याम पाटील यांनी प्रकाशित केलेले हे ' मानाचं पान ' विकत घेवुनच वाचावे लागेल आणि संग्रही ठेवावे असेच आहे. नुकतीच त्याची दुसरी आवृत्ती प्रकाशित झाली आहे. चवदार मंडळींच्या चविष्ट खाण्याचे चोचले मांडणारे हे मानाचं पान आहे. वलयांकित व्यक्ती खातात तरी काय? या प्रश्नाचे उत्तर देणारे हे पुस्तक आवर्जून वाचावे असेच आहे. खूप दिवसांनी काहींतरी हलकेफुलके,वेगळ्या धाटणीचे आणि नवं वाचल्याचे आत्मिक समाधान आहे.

नामवंताची खवय्येगिरी या विषयाचं अफलातून पुस्तक
'मानाचं पान'
लेखक : सुधीर गाडगीळ
प्रकाशक : घनश्याम पाटील (चपराक प्रकाशन)
मूल्य - ₹ १५०

✍️ सर्वेश फडणवीस

चपराक प्रकाशन,घनश्याम पाटील