एक टप्पा आउट..

शेक्सपीअर म्हणून गेला आहे की, 'नावात काय आहे'? मला काही हे सहजासहजी मान्य होणारं नाही. मान्य होणार नाही म्हणजे आपण काही थोरामोठय़ांविषयी सवंग किंवा उगाच वादग्रस्त विधानं करून लोकप्रियता मिळवणाऱ्यांपैकी नाही. पण ह्या माध्यमातून एका नावाबद्दल मला लिहावसं वाटतं त्यांच्या टाईमलाईन, त्यांच्या लेखसंग्रहाविषयी लिहावसं वाटतं आहे.  खरंतर त्यांच्या पुस्तकातून त्यांची ओळख तर होतेच पण रोजच्या जगण्याचा मूलमंत्र लेखक तन्वीर सिद्दीकी देतात. एक टप्पा आउट भाग १ आणि एक टप्पा आउट भाग २ हे लेख संग्रह हाती आले. हा वीकेंड खऱ्या अर्थाने आनंद देणारा होता, शुक्रवारी पुस्तकं आली,पहिल्यांदा सहज चाळली आणि मग वाचायला घेतले. हृषीकेश वडके ह्याच्या ऋचित प्रकाशनाने ही पुस्तकं प्रकाशित केली आहेत. उत्कृष्ट मुखपृष्ठ आणि आतील पेपर ही उत्तम आहे. त्यामुळे बघता क्षणीच पुस्तक आवडतं. खरंतर फेसबुकच्या विश्वातील ही श्रीमंत माणसं आहेत. लेखक तन्वीर सिद्दीकी ह्यांच्या टाईमलाईन वर जरी चक्कर मारून आलो तरी आपल्याला माहितीचा खजिना तर मिळतोच पण तन्वीर ह्यांची प्रत्येक छोट्या-छोट्या घटनेकडे बघण्याचा व्यापक दृष्टिकोनाची  ओळख होते. तन्वीर ह्यांनी सकारात्मकतेचे वलयच पांघरले की काय इतका भास त्यांचा लेख संग्रह वाचतांना होतो.

सहज सोपी भाषा आणि रोजच्या जगण्यातील समृद्ध अनुभव ही लेखनाची ताकदच म्हणता येईल. हा लेख संग्रह वाचतांना जाणवतं की बऱ्याच घटना आपल्याही अवतीभवती नकळत घडत असतात. आपण दुर्लक्ष करतो पण तन्वीर आपल्या पुस्तकांत तीच घटना तोच प्रसंग वेगळ्या नजरेतून बघण्याची दृष्टी देतात. आपुलकी, ममत्व, माणुसकी,प्रेम, त्याग,जिद्द,उमेद ह्या सर्व गुणांनी युक्त हे दोन्ही भाग परिपूर्ण आहेत. सहजपणे व्यक्त होण्याला  सहज आणि सोपे शब्दही आपलेसे करणारे वाटतात. शब्दांची ताकद वाचतांना जाणवते. पहिल्या भागात ४२ आणि दुसऱ्या भागात ३१ लेख आहेत. ह्यामधील प्रत्येक लेखाची स्वतंत्र ओळख आहे. त्यामुळे कुठल्याही पानापासून सुरू केलं तरी वाचतांना तोचतोचपणा जाणवत नाहीच. प्रत्येक पानावर नवा विचार देतांना ते अधिक प्रमाणात पुन्हा पुन्हा वाचावेसे वाटते. समाजाकडे बघण्याचा दृष्टिकोन आणि बदलण्याची ताकद ह्या दोन्ही बाबी पुस्तकांत आहे. काही प्रमाणात का होईना पण आयुष्याकडे बघण्याचा दृष्टिकोन नक्कीच बदलू शकतो. म्हणून एकदा हे पुस्तक वाचाच.. संग्रही असावे असे तर आहेच पण भेट म्हणून ही देण्यास उत्तम असे एक टप्पा आउट.

एक टप्पा आउट - १ व २ 

ऋचित प्रकाशन, पुणे 

मूल्य ₹१०० व ₹१२०

✍️ सर्वेश फडणवीस